Նազելի Ավագյան

Բիզնեսի հաջողության բանաձևը.
Պրոֆեսիոնալ և օպերատիվ մոտեցում

Մասնագիտությամբ բանասեր մանկավարժ եմ, ունեմ վեց տարվա լրագրողական աշխատանքային փորձ: Աշխատում էի Ստեփանավանի քաղաքապետարանում՝ որպես կրթության, մշակույթի, սպորտի, երիտասարդության, լրատվության և հասարակության հետ կապերի առաջատար մասնագետ: Տեղեկացա, որ Ստեփանավանում անցկացվելու է Հայաստանի երիտասարդ կանանց ասոցացիայի կողմից իրականացվող «Կանանց սոցիալ-տնտեսական հզորացում Հայաստանում» ծրագրի բիզնես դասընթացը: Որոշեցի հմտություններս զարգացնելու համար մասնակցել դասընթացին:
Ծրագիրն իմ առջև բացեց նոր հեռանկարներ՝ տալով կարևոր գիտելիքներ և հմտություններ մինչ այդ ինձ համար խորթ ոլորտի՝ բիզնեսի վերաբերյալ: Էությամբ լինելով ստեղծագործող և փոքր-ինչ երազկոտ մարդ՝ երբևէ չէի մտածել սեփական բիզնես ունենալու մասին՝ թեև հոգուս խորքում դեռ փոքրուց ունեցել եմ թաքուն երազանք՝ ունենալ սեփական հեռուստաստուդիա: Հայաստանի երիտասարդ կանանց ասոցիացիայի կողմից անցկացված ձեռներեցության դասընթացի արդյունքում ձեռք բերած բիզնես-գիտելիքները համադրելով լրագրողի մասնագիտական գիտելիքներիս հետ՝ սկսեցի մտածել փոքրիկ հեռուստաստուդիա բացելու մասին: Թերևս ամենամեծ ձեռքբերումը, որ ունեցա ծրագրի արդյունքում հենց դա էր՝ սեփական ստուդիա հիմնելու գաղափարի առաջացումը, ինչպես նաև վստահությունը սեփական ուժերի հանդեպ և հավատը, որ ես կարող եմ իրականություն դարձնել հոգուս խորքում անթեղված «թաքուն» երազանքը և սեփական գործով հասնել հաջողությունների:
«Կանանց սոցիալ-տնտեսական հզորացում Հայաստանում» ծրագրի շնորհիվ ես այսօր հանդիսանում եմ Հայաստանի կին ձեռնարկատերերից մեկը: Թեև լինելով երիտասարդ՝ արդեն ունեմ տեսանյութերի արտադրության փոքրիկ հեռուստաստուդիա՝ զինված ժամանակակից տեսանկարահանման և ձայնագրման տեխնիկայով, որոնք ձեռք եմ բերել ծրագրի արդյունքում ստացած դրամաշնորհի շնորհիվ: Այս ծրագրի շնորհիվ ես իրականություն դարձրեցի սեփական հեռուստաստուդիա ունենալու իմ երազանքը, դրեցի առաջին հիմնաքարն ու հիմա քայլ առ քայլ փորձում եմ առաջ գնալ՝ օրեցօր ինձ զգալով ավելի ինքնավստահ, ֆինանսապես ավելի կայուն և անկախ: