Որոշվեց գյուղմթերքների արտադրության ոլորտի կին հերոսը

Հայաստանի հանրային ռադիո > Ռադիոլուր

Այս տարի կանանց միջազգային օրը նվիրված է գյուղաբնակ կանանց: Տոնի պատեհ առիթից օգտվելով՝ ՕՔՍՖԱՄ կազմակերպությունը և Հայաստանի երիտասարդ կանանց ասոցիացիան առաջին անգամ նախաձեռնեցին «Գյուղմթերքների արտադրության ոլորտի կին հերոս» մրցանակաբաշխությանը:

Այսօր տեղի ունեցան մրցույթի արդյունքների ամփոփումը և գյուղմթերքների ցուցահանդես-տոնավաճառը: Ինչպես հայտնեց Հայաստանի երիտասարդ կանանց ասոցիացիայի նախագահ Լիլիթ Ասատրյանը, մրցույթին հանրապետության տարբեր մարզերից ստացվել էին հարյուրից ավել հայտեր:

Խրախուսվեցին մեր գյուղերում իրենց գործունեությամբ հաջողության հասած կանայք։ Հաղթողները ներկայացնում էին Ամասիա, Օշական, Բերդ, Թթուջուր, Գինեվետ, , Գանձաքարմ, Ակնաղբյուր, Դարբաս, Հերմոն, Ակնաշեն, Արամուս գյուղերը:

Միջոցառմանը ներկա էր մեր երկրում ԱՄՆ արտակարգ և լիազոր դեսպան Ջոն Հեֆֆերնը տիկնոջ հետ: Ծանոթանալով տոնավաճառում ներկայացված գյուղատնտեսական արտադրանքի տեսականուն և կատարելով որոշ գնումներ, դիվանագետը գոհունակություն հայտնեց նման մրցույթի անցկացումից:

«Կարևոր է խթանել գյուղի կանանց և այս միջոցով նաև գյուղատնտեսության զարգացմանը` կոոպերացիաների և այլ միավորումների միջոցով: Կանայք այսօր բավականին մեծ ներդրում ունեն այս ոլորտում և ես ու իմ տիկինը տպավորված ենք»,- ասաց նա:

Ըստ մրցույթի կազմակերպիչների՝ այս ծրագիրը կրելու է շարունակական բնույթ, քանի որ կանանց մասնակցությունն այստեղ չափազանց կարևոր է, նշեց Հայաստանի երիտասարդ կանանց ասոցիացիայի նախագահ Լիլիթ Ասատրյանը:

Արտակ Բարսեղյան
«Ռադիոլուր»

Աղբյուր